Բուլատ Օկուջավան այն գրողներից է, ում հոգևոր ներկայությունը նրա ֆիզիկական բացակայությամբ բնավ չի նվազել, եթե ոչ՝ հակառակը: Բանաստեղծի մահից ահա քառորդ դար անց էլ, նրա բանաստեղծությունները, որոնց մեծ մասը հեղինակը նաև հոգեխոս երգերի է վերածել, հազարավոր մարդկանց կյանքում շարունակում են ապահովել նրա հաճելի, կարևոր ներկայությունը: Բանաստեղծի երկրպագուները շատ են նաև Հայաստանում, և միանգամայն ողջունելի է բանաստեղծ, թարգմանիչ Լևոն Բլբուլյանի՝ նման մի ընտրանի կազմելու, թարգմանելու նախաձեռնությունը, որն ընդգրկում է Օկուջավայի՝ տարբեր տարիներին ստեղծված հարյուր՝ թե վաղուց սիրված, թե ոչ այնքան հայտնի ստեղծագործություններ: Գիրքը գեղեցիկ, խորհրդանշական նվեր է հրաշալի բանաստեղծի ծննդյան 100-ամյակին: