Աշխատանքի առաջին գլխում գինու համաշխարհային մշակույթի զարգացման համատեքստում ներկայացվում են գինու հոգևոր և նյութական ընկալման խնդիրներն ու մոտեցումներն արաբական աշխարհում՝ սկսած վաղնջական ժամանակներից մինչև իսլամի ընդունումը: Գինու տեխնոլոգիական մշակույթի տարրերի փոխանցման համատեքստում վերլուծության է ենթարկվում վաղ միջնադարյան արաբական պոեզիան: Երկրորդ գլխում ներկայացվում է իսլամի վերաբերմունքը գինուն, քննվում են սուննի և շիա ուղղություններում այդ վերաբերմունքի ընդհանրություններն ու առանձնահատկությունները: Բերվում են իսլամում ոգելից խմիչքի արգելքի պատմաքաղաքական, բարոյահոգեբանական, աստվածաբանական, տեխնոլոգիական և կենցաղային-տնտեսական հիմքերը: Երրորդ գլուխը նվիրված է միստիկ իսլամի և գինու բարդ ու նուրբ փոխհարաբերություններին: Մասնավորապես, պարսիկ ու արաբ միջնադարյան որոշ սուֆի պոետների ստեղծագործությունների վերլուծությունների հիման վրա որոնվում են հնարավոր զուգահեռներ գինու հոգևոր և նյութական ընկալումների միջև: