«Տոկեի Մարու» նավի պատմությունը հիմնված է իրական փաստերի վրա, որոնց ուսումնասիրությունն առաջին անգամ հայկական կողմից իրականացրել է տ.գ.թ., միջազգայնագետ, ճապոնագետ Աննա Վարդանյանը, ով փաստում է, որ հետազոտության համար հիմք է հանդիսացել մի պատահական դիպված. «Ինձ պատահեց մի նկար, որում պատկերված էր ճապոնական նավը՝ խարիսխ գցած Զմյուռնիայի նավահանգստում»: Այս իրողությունը հետազոտողին տանում է Հունաստան, Ճապոնիա և Հայոց ցեղասպանության թանգարան-ինստիտուտ՝ շարունակելու իր ուսումնասիրությունը: Ուսումնասիրվել է ճապոնական նավի օրինակը՝ փորձելով պատմական փաստերի համադրմամբ ստանալ փրկության գործընթացի իրական պատկերը, շարժառիթներն ու հետևանքները՝ ականատեսների, վերապրողների հուշերի և վկայությունների հիման վրա: Հետազոտության նպատակը ճապոնական նավի օրինակով Զմյուռնիայի հայ և հույն տարագիրների փրկության գործընթացի ամբողջական ներկայացումն է: Ուսումնասիրվել են Զմյուռնիայի հրկիզման, տեղի քրիստոնեաբնակ թաղամասերի հայ և հույն բնակչության բնաջնջման պատմությունը, բացահայտվել են ճապոնական նավի ժամանման, վերապրողներին հունական ափ հասցնելու մանրամասները: