«Ես փոքրիկ գիտնական եմ» ձեռնարկը հեղինակի երկրորդ հանրամատչելի աշխատությունն է «Գիտության այբբենարան»-ից հետո: Այն նախատեսված է յոթ տարեկանից բարձր երեխաների, ուսուցիչների և, առհասարակ, հետաքրքրասերների լայն շրջանակի համար: Հեղինակի նպատակն է ծնողի կամ ուսուցչի օգնությամբ դեռևս վաղ տարիքից աշակերտներին սովորեցնել ինքնուրույն կատարել բացահայտումներ, ուսումնասիրել և գտնել բնության մեջ, շուրջը կատարվող երևույթների պատճառահետևանքային կապերը, զարգացնել վերլուծական և հետազոտական մտածողություն: Ուսումնառողները ձեռնարկի միջոցով կգտնեն շատ ու շատ հարցերի պատասխաններ, որոնք վերաբերում են երկրագնդի կենսականությունն ապահովող գործոններին, մասնավորապես՝ մարդկային ու կենդանական աշխարհի ստեղծմանը, շարունակականությանը: Հետազոտության ճանապարհը աշակերտներն անցնելու են իրենց իսկ կատարած փորձերի օգնությամբ, որոնք քայլ առ քայլ նրանց կմոտեցնեն բնական գիտություններին: Այս հրաշալի ձեռնարկը կնպաստի, որ աշակերտները ինքնահաստատվեն ինքնուրույն ձեռք բերած նոր գիտելիքի շնորհիվ, ինչն էլ կօգնի ձևավորելու բարձր արժեհամակարգ, գիտելիքահեն առաջնահերթություններ: